Istaknuta crnogorska filmska i pozorišna glumica i doajenka Crnogorskog narodnog pozorišta Varja Đukić, dobitnica je prestižne nagrade SEE Actress 2026 za izuzetan doprinos filmu, pozorištu i kulturnom životu Jugoistočne Evrope, objavila je direkcija Festivala filma JIE – SEE FF.
Kako se navodi u saopštenju, nagrada je ustanovljena osnivanjem SEE Film Festivala 2011. godine, a među dosadašnjim laureatima su Anja Šovagović (Hrvatska), Cvetana Maneva (Bugarska), Milena Zupančič (Slovenija), Enikő Eszenyi (Mađarska), Anica Dobra (Srbija), Miki Manojlović (Srbija), Meto Jovanovski (Makedonija), Emir Hadžihafizbegović (Bosna i Hercegovina), Rade Šerbedžija (Hrvatska) i Ion Caramitru (Rumunija).
Glumica izuzetnog umjetničkog senzibiliteta i intelektualne snage, Varja Đukić ostvarila je impresivnu karijeru dugu više od četiri decenije na filmu, televiziji i u pozorištu širom bivše Jugoslavije i Evrope. Diplomirala je na Fakultetu dramskih umetnosti u Beogradu, a međunarodnu afirmaciju stekla je ulogom u kultnom filmu Variola Vera reditelja Gorana Markovića, za koju je nagrađena priznanjem za najbolju debitantsku ulogu na Jugoslovenskom filmskom festivalu u Puli.
Tokom bogate karijere sarađivala je s najznačajnijim rediteljima i pozorišnim institucijama regiona, među kojima su Crnogorsko narodno pozorište, Jugoslovensko dramsko pozorište, Budva Grad teatar i Kraljevsko pozorište Zetski dom.
Uloge u predstavama kao što su Joneskomanija, Ko se boji Virdžinije Vulf, Višnjik, Banović Strahinja, Nigdje nikog nemam, Pod oba sunca i u brojnim savremenim ostvarenjima, donijele su joj neka od najvažnijihpozorišnih priznanja na Balkanu, uključujući Sterijinu nagradu, nagradu MESS-a, više nagradaArdalion za najbolju glumicu, dvije Velike nagrade CNP-a. Varja Đukić je doajen Crnogorskog narodnog pozorišta.
Pored izuzetne glumačke karijere, Đukić je prepoznata i kao spisateljica, rediteljka, kulturna djelatnica i osnivač značajnog kulturnog prostora i knjižare „Karver“ u Podgorici, koji je tokom godina postao važno regionalno mjesto književnosti, dijaloga i nezavisne umjetničke
razmjene.
Festival filma Jugoistočne Evrope (SEE FF) predstavlja jedinstvenu međunarodnu platformu s etabliranim centrima u Parizu, Berlinu, Vašingtonu i Skoplju, posvećenu promociji filmske
umjetnosti i jačanju međunarodne kulturne saradnje. Od osnivanja, SEE FF već više od decenije okuplja ugledne filmske autore, umjetnike, univerzitete, institucije i kulturne radnike iz cijelog svijeta.
Šesnaesto izdanje SEE FF festivala biće održano od 1. do 6. juna 2026. godine, pod pokroviteljstvom Ministarstva kulture Francuske i uz podršku Ministarstva kulture i medija Crne Gore. Ovo festivalsko izdanje obuhvatiće hibridne programe i događaje koji će se istovremeno održavati u tri velike svjetske prijestonice — Parizu (INALCO/Sorbonne), Berlinu (Humboldt University) i Vašingtonu (American University).
zenskiportal.me
